الاثنين، 26 يوليو 2010

مغامرات فطوطة فى موسكو 1

أيوة مغامرات


لما رجل يقترح رحلة لبعض الدول بلا شركة سياحة أو مرشد وتوافقه زوجته وابنته ويعرض الموضوع على الاصحاب فلا يجد سوى ثلاثة من السيدات المجانين

انا منهم يشجعوه ويتبعوه طبعا دى مغامرة
........

الذهاب الى موسكو وسانت بيترزبرج لاول مرة لنا جميعا مغامرة
..........
حجز الفنادق والطيران من خلال النت
مجهودات فردية لعمل كل شئ مغامرة
,,,,,,,

عند وصولنا مطار موسكوالمفاجأة الاولى
ولا يافطة باللغة الانجليزية ولا غيرها
فقط الروسية لا احد يتكلم سوى الروسية
من موظفى الطيران وحتى سائقى التاكسى الممتلئ بهم المطار ويكون التفاهم لغة الاشارة .....
وموظفات الفندق يادوب بيحاولو يتكلموا لغة انجليزية وهذا ما رحمنا قليلا
.......

ونتسك أول قلم....
ويطلب السائق 120 دولار فى التوصيلة لفندق كوزموس 3 نجوم واضح فى الصورة



وندفع وطبعا نكتشف ان هذا مبلغ مضاعف
.......
لما يكون عدد غير قليل من شعب موسكو نصاب وحرامى يسرقك عينى عينك تدخل تغير فلوس يعد لك من وراء الطابق الزجاجى وكله تمام ..........
وتتسلم المبلغ لتجد ان الفكة من مئات وعشرات سليمة تماما وان السبع الاف بقدرة قادر بقوا أربعة
(ده حصل معايا بس واحد مصرى قابلته صدفة كان محذرنى) ورفضت اخرج قبل ما اخد فلوسى كاملة .... فتظاهر بانهم كانوا لازقين فى الدرج
وان العشرة الاف بقوا ستة (وده حصل مع قائدنا فى السفر رغم تحذيرى له) ده طبعا بعد ما فتح الباب فور تغييره علشان يخرج وقفلوا وراه وبعدها نخبط دماغنا فى الحيطة ولم ترجع الاربعة الاف روبل وهى ما يوازى800 جنيها تقريبا شعب قليل الذوق يزق ويشتم فى المترو والشارع والسوبر ماركت - موظفة المترو بالاشارة على الخريطة علشان تحجز لنا عصبية وبتزعق على طول ومثلها الكاشير فى السوبر ماركت يبقى نعمل ايه ؟؟؟؟؟؟؟؟؟ مترو الانفاق الاسطورة ذو الستة طوابق تحت الارض ذو سلالم كهربائية طويلة جدا وسريعة جداجدا......والخطوط 12 وكل خط بلون وكل لون فى طابق معين واتجاه مختلف

متاهة كبيرة صال وجال فيها فطوطة ومن معه لانها ارخص واسرع وسيلة للتنقل وكله بالخريطة والاشارة
فيه محطات تحفة معمارية وأثرية كما هو واضح فى الصور التالية


فيه صور ومناظر بجد تحفة من داخل المحطات بس للاسف احنا ظاهرين فيها مش حينفع اعرضها
اصل المناظر جميلة وظهورنا (قلل أقصد زاد) من جمالها
ايون حلوين وأحلى من بتوع سانت بيتر كمان
حد معترض
؟؟؟؟؟؟؟؟؟؟؟؟؟؟؟

ومحطات أخرى قذرة وارضها غير ممهدة واكيد اسوأ كتير من محطة رمسيس التى ركبت منها منذ اعوام... ودى منها محطة فادنخا اللى كنا فيها تقريبا العتبة عندهم لاننا فضلنا نسكن فى وسط البلد على السكن فى فندق فاخر جنب المطار تجنبا لاستخدام التاكسيات
..............
اما موظفة الطيران واحنا راجعين تقول ادفعوا وزن زيادة 2500 روبل .. قلنا ناخد هاند باج فى ايدينا وهى نصف الوزن الزائد
قالت برضة حتدفعوا نفس المبلغ روبل لو عايزين ايصال
أو
1000روبل لى وأعديكم
ببجاحة غريبة
سألنا عن مكتب الرئيسة
وسالناها تتحدثى الانجليزية
فنظرت بقرف وهزت رأسها
وطبعا دفعنا الرشوة علشان نخلص
..................


بلد غالية بشكل غير طبيعى
زجاجة المياه الصغيرة تبدأ من5 جنيهات وحتى 10 جنيهات فى الماركت والشارع وليس الكافيه
الملابس والتوكيلات أضعافها عندنا رغم ان متوسط دخل الفرد حوالى 3000 جنيها كما اخبرنى رجل أعمال روسى جلست بجانبه فى القطار السريع من موسكو الى سانت بيترزبرج والذى استغرق 6 ساعات وتكلفة التذكرة ما يوازى الف جنيها مصريا
.......................

السيدات والرجال ليست بنفس مستوى الجمال والاناقة واللياقة التى وجدناها فى اهل سانت بيترزبرج
........................
ورغم المغامرة اكتشفنا اننا اكثر حظا وأكثر متعة من مجموعة اتت تبع شركة سياحة بالمهندسين
الطائرة تأخذ 4ساعات من القاهرة الى موسكو
شركة السياحة عملت لهم ترانزيت فى روما 6 ساعات ذهابا وعودة وكده ضاع منهم يومين من الست ليالى وعملت لهم جولة أول بوم فى سانت وموسكو واليوم التانى جولة حرة
صراحة احنا تعبنا يوم علشان نعرف
لكن استمتعنا احدى عشر يوما اخرى
......................

وطبعا فيه حاجات جميلة فى البلد زى الساحة الحمراء والكريملين ودى معلومات انا حصلت عليها من النت قبل سفرى فيه كمان الحدانق الساحرة فى الميدان الاحمر
ولنا لقاء اخر مع الجميل فى موسكو ولقاءات ساحرة مع روعة مدينة سانت بيترزبرج وجمال الناس فيها مختلفين تماما عن اقاربهم فى موسكو


هناك 7 تعليقات:

  1. أية دة

    دة بوست متعاد

    ):

    ردحذف
  2. صح يا رامى
    هو انكتب على موقع تانى وعلشان كده لم يظهر عند الجميع
    تحياتى

    ردحذف
  3. لاحظت انا ان كل البلاد اللي ابتدت بشعارات جبارة غير منصفة انتهت بالأتي
    1- اللي بيحكموا بيعيشوا في قصور وبقية الشعب في المجرور
    2- اغلبها شعوب جعانة وحرامية واللي راح تركيا يقول لك برضه السرقة عيني عينك وبيحذروا الناس قبل ما ينزلوا الشوارع وبيتسرقوا باحتراف ومهارة برضه
    3- الغريبة انهم سيئي التعامل مع السياح
    وبكده احنا احسن
    لأن السياحة مصدر تقليب رزق فاكله بيبقى ذوق مع السائح
    تدخلي محل جزم في شارع جامعة الدول العربية يسيبك ويطنشك مجرد ما يدخل خليجي
    هيييييييييييييييييييييييه
    مصر احسن
    انت في بلدك واحنا عليها ضيوف :)

    لأ بس شجعان شجعان صراحة
    تروحوا من غير وكيل سياحي تبقوا كفاءة ورجولة
    عقبال الفسحة الجاية ان شاء الله

    ردحذف
  4. ههههههههههههههههههههه
    لسه عماااااااااااااار يا بلدى رغم السرقة الاف السنين

    رحلة فعلا يطلق عليها مغامرات
    بدون وكيل وبدون مرشد فعلا والله وعملوها الرجالة

    الشعب الروسى فى اعتقادى تعلم كثيرا من الشعب العربى
    وبهتنا عليهم باين كده

    الصور ماشاء الله جميلة بس ولو مصراوووووووى مصراوووووووووووووى

    اتمنى انكوا لما تعملوا كده تانى تسجلوا اسمائكم فى السفارة المصرية فى اول نزول لروسيا
    حتى تستطيع السفارة التدخل فى اى خلاف او مشكلة

    منتظر بقى الحكاية والمغامرة الممتعة

    والله انتوا ناس عسسسسسسسسسسسسسسسسسسسل

    ردحذف
  5. كويس اننا احسن من غيرنا
    خالى فى تركيا المرشد اللى كان معاه هو اللى سرقه شخصيا
    عقبال السنه اللى جايه
    الصور تحفه

    ردحذف
  6. زعلتينى كان نفسى ازور روسيا اوى
    بس مغامره اكيد مش تتنسى برغم كل المشاكل دى بس اكيد فرحتوا واستمتعتوا
    عقبال رحلات تانى كتير بس تكون من غير تعب انشالله
    عموما فى السفر سبع فوايد زى ما بيقوله
    تحياتى

    ردحذف
  7. بس الفندق إللي نزلت و فيه بعيد عن وسط البلد

    ردحذف