بمناسبة الامتحانات

مثلث الرعب

1-المدرس

2- التلميذ

3-المنهج الدراسى

والمسكين الحائر فى قلب هذا المثلث

------- ولي الأمر المطحون -----

طبعا مالناش كلام عن اصحاب المدارس

دى ناس واضحة بيعملوا مشروع للربح المادى
بيزنس از بيزنس

--------------
نيجى للمدرسين ودول فريقين //
فريق مطحون وغلبان وغلبه بيطلع على الاولاد
وفريق حافظ المنهج ومش فاضى والساعة عنده تساوى كتير--
الاثنين مختلفين

ولا يتفقوا الا فى ان اغلبهم لا يعرف كيف يحتوى الطالب
و يحببه فى المادة بتوصيل المعلومة بابسط الطرق

---
اما سياسة التعليم مش قادرة اتكلم عنها لكن بمقارنة بسيطة باى سياسة تعليمية فى اى دولة نقدر نفهم
بمقارنة حال الطالب فى اى مرحلة بحال مثيله ممكن نحس اد ايه اولادنا تعساء
اد ايه بيحبوا كل حاجة ما عدا المدرسة
بيفهموا فى كل حاجة ماعدا المنهج التعليمى
طيب دى مسئولية مين
سيادة الوزير اللى متبع سياسة الشرطة فى الحملات التفتيشية ممكن يخلص كام فى المية من المدارس فى كام سنة
..........................
المفروض ان هناك سيستم او نظام عمل يتم العمل به سواء كان سيادته متواجد او لا
بمعلوماتى الضحلة بقول

لو وضع نظام صح

-- يطبق صح

-- يسير عليه الجميع
اولياء الامور

------حدث ولا حرج--------
انا باتكلم لانى بقالى اكثر من شهر تعبانة مع ابنى الصغير ومدرسات المرسة
ابنى يحافظ على عمل واجباته ودائما نتائجه فوق 95% ولكنه كثير الحركة وتكون النتيجة الدائمة الضرب وشد الاذنين ليجلس ساكنا بلا حركة
ومع اعتراضى اكتشف انه اقل طفل يضرب فى الفصل والاهل مستكينين وعادى
واصحاب المدرسة يتشدقون انه لا ضرب بتاتا عندهم
انا حاولت بكل الاساليب السلمية وغيرها واخيرا تعبت والولد كره المدرسة وقعدته فى البيت لحين انتهاء الامتحانات لانقله الى مدرسة اخرى الله اعلم كيف سيكون مدرسيها

؟؟؟؟؟؟؟؟؟؟؟
تفتكروا ايه الحل فى سياسة التعليم الراقية بتاعتنا خاصة ان طلبة الجامعة الان لا يستطيعون كتابة جملة عربى واحدة بدون غلطات املائية تكسف

وبمناسبة اللغة العربية الشاطر يجاوب الامتحان ده
امتحان اللغة العربية للثانوية العامة لعام 2010

السؤال الأول: التعبير

اكتب ما لا يقل عن 650 سطر في احد الموضوعات التاليه:

-لم يجد الطفل غير الشارع ملجأ.. فاتجه إلي السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة

2- شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 6500 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز

3- بعد انتشار ظاهرة أكل لحم الكلاب والحمير.. من وجهة نظرك تكلم عن هذه الظاهرة.... وبدون غلط.. الورق متراقبـــــــــــــــــــــــــــــــــــــــــــــــ

السؤال الثانى: القصة

من قصة " وعهد الله ما انت داخل الانتخابات" .. اقرأ القطعة وأجب عن الآتى ..

ثم أتى إليه وضربه بالجزمة وقال: انت عايز تترشح فى الانتخابات؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟

- ما هى اللحمة؟ حدد أقرب معنى خيالى لها

- مرادف معجزة فى اللغة

( تغيير وزارى – زيادة المرتبات – القضاء على البطالة )

ــــــــــــــــــــــــــــــــــــــــــــــــــــــــــــ

السؤال الثالث القراءة

من موضوع

( الزعيم..والفنان.. والقدوة)

اقرأ القطعة وأجب

وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا كما أنه يرحب بالتوريث ومقتنع بكل سياسات الحكومة - فى رأيك هل يصلح عادل إمام لوزارة الثقافة أم لوزارة الصناعة ؟؟ ــــــــــــــــــــــــــــــــــــــــــــــــــــــ

السؤال الرابع النصوص

أجب عن أحد النصين الآتيين

من نص ( ماشربتش من نيلها)..

اقرأ ثم أجب ....

ماشربتش من نيلها..

جربت تغنى لها..

جربت فى عز ماتحزن تمشى ف شوارعها وتشكى لها

- بعد ان ارادت صاحبة النص تلد ابنتها فى أمريكا لتحصل على الجنسية الأمريكية..

اختر..ما المقصود بنيلها فى النص؟

(المسيسبى- الأمازون – يونج يانج )

- هذا النص من نصوص الحزب الوطنى والدليل وجود اسم مهم من قيادات الحزب فى النص

.استخرج الاسم..وبوسه ورجَّعُه مكانه

- أكمل الأبيات إلى آخر الكليب

ـــــــــــــــــــــــــــــــــــــــــــــــــــــــــ

السؤال الخامس: الخط

- دعوة أم لابنها:

الهى اشوفك لاعب كرة مشهور

اوفنان حتى لو كان مغمور

: اكتب الجملة السابقة ثلاث مرات بثلاثة خطوط

موبينيل وفودافون و اتصالات