دعااااء الكروان

قرأت هذا الدعاء لاحد المصريين

دعاء مصري مطحون
اللهم أنقذنا من نفسية الزملاء .. وغباء الأصدقاء

...........

اللهم ارحمنا من استبياع الجيل الجديد ..

وحرائق السكة الحديد واستقصاد كل مدير ..

.........

وندالة القرايب

الصغير منهم والكبير

...........

اللهم أغثنا من كل عميل ..

ومن فواتير موبينيل

................

اللهم أرحمنا من تشريفة عربيات المسئولين

وزحمة الشوارع في كل حين

وسحب الرخص في كل كمين.. من الغلبان مش م المتين

اللهم أهدى لنا سواقين الميكروباص والمدير البصباص

..............

اللهم ارحمنا من الشئون القانونية وشئون العاملين

واللي بيقفوا فـ وسط الشارع فجأة وبدون إشارة يمين

............

اللهم قنا شر الكليبات ..وشر شلل البنات ..

ولؤم الستات وغباوة الحموات

...........

والمينيمم تشارج كافيهات..

وهيافة الصحف والمجلات

...............

وقطع الحرارة فجأة عن التليفونات وقت الزنقات

والمدارس اللي بتطلب الآلاف تبرعات

ووقـوع السيـرفـر وقفلـة السايتـات

..............

اللهم ارفع مستوى الزمالك .. لمستوى انبى والحدود ..

أو حتى مستوى أسمنت أسيوط

أو أرسل يارب عليهم صاعقة.. بدل ما يخلونا نموت ...

............

اللهم سدد أقساطنا .. وضلل عنا مآمير الضرايب

اللهم ارزق جيل الوسط عقود عمل في ليبيا وقطر

اللهم افتح لجيلنا القديم الطريق الفسيح

...................

اللهم ارحمنا من الاكتئاب مرض العصر والشباب

واحمي يا رب سماء مصر من سحابة الهباب

...............

واكفنا شر صاحب الدقن الكداب

وصاحب التصريحات النصاب

............

اللهم ارزق كل بنت بعريس هدية ..

وكل شاب بوظيفة وشقة وعربية

اللهم أحرق الـ 0900

اللهم احرق ال 0900

الهم اضرب الحرامية بالحرامية

ونجح أي طالب في أي كلية

حتى ولو كان في التربية الموسيقية

آآميين آآآمين

احببته قدرى

أحببتك قدرى

سامحت أيام عذابى من أجلك

تصالحت مع الدنيا بعد طول خصام
غفرت لها قسوتها

............

منحتنى نظرة عينيك الحانية القدرة على التسامح
فعفوت عن ايام الحرمان الطويلة

ملات القلب بالفرحة .. وساعدته على الغفران
فتصالح مع كل البشر

سامح من غدر وغفر لمن طعن

ولم يبق بداخله سوى الحب
كل الحب .. لكل البشر

..............

منحنى حضنك الدافئ اجمل ساعات من السعادة
منحنى وجودك فرحة اليوم .. واشراقة الغد

لقد اصبحت فكرى .. وقلمى .. وحديث نبضاتى
نبضات عاشت طويلا اسيرة الخوف ..سجينة العقل
حررتها قدرى لتهبك طواعية احلى نبضاتها
فككت اسرها .. لتظل مليكتك الى الابد .

يابتاع الازهر يا واد انت

قبل ان يبلغ ابنى الثالثة كان قد اصبح يتيم الاب .
وعاهدت الله ان اربيه

على منهج الاسلام وسنة نبيه عليه الصلاة.

وبدات البحث عن مدرسة ازهرية للغات
فكانت اقربهم فى التجمع الخامس وانا من سكان المقطم .

فاشفقت على ابنى من طول الطريق وخطورة الدائرى .

خاصة ان ابنى عنده فرط حركة( overactive )

وادخلته اقرب مدرسة لبيتنا .

وحينما انتقلنا الى الاسكندرية ..
كنت غاية فى السعادة ان اجد مدرسة ازهرية للغات

تبعد عن بيتنا خمس دقائق
والتحق ابنى ب kg2

لم الق بالا لبعض الاختلافات الصغيرة بين المدرسة والمنزل
حينما عملت عيد ميلاد ابنى العام الماضى بفصله كما اعتاد
طلبوا عدم ذكر عيد ميلاد وعدم وجود شمع
خوفا من ثورة بعض اولياء الامو المتزمتين
وحاولت اقناع ابنى ان المهم ان يسعد مع زملائه
ووافق على مضض وهو يلعن نظام المدرسة

وهذا العام اقنعته ان يشترى لنفسه ما يشاء ويسعد به

وحينما جاءنى قائلا ان التماثيل حرام
وطبعا( انا شقتى خالية منها تماما ولكن بيوت الاهل )
اقنعته ان حرام عبادتها فقط
وجاءنى يقول ان الاحتفال بعيد الام حرام
وكان حديثا طويلا اننا نكرم الام التى كرمتها الاديان

اخشى ان يزداد التناقض بين المجتمع الخارجى والمدرسة
اتمنى ان يتم ابنى المرحلة الابتدائية بها.

فهى للحق تركز على التربية
وتعليم القيم والاخلاق الحميدة بصورة اكبر وتوسع اكثر
وتعطى دائما القدوة الحسنة لكل تصرف

واصحاب المدرسة و هم مديرينها متدينون بلا تزمت
وللامانة يراعون الله فى كل تصرف
ويحاولون تعويض منع الموسيقى وغيرها بالرسم والفروسية
ومعظم مدرسينها يتقون الله

ولكن المدرسة فى النهاية ملتزمة بنظام الازهر الشريف
و يوجد الكثير من اولياء الامور المتزمتون
اللذين يثيرون بعض البلبلة

واخشى على ابنى من الانفتاح الكامل فى باقى المدارس
خاصة ان عنده استعداد رهيب لهذا الانفتاح
بعنى مش حاعرف اسيطر عليه
انا مشفرة كل قنوات الاغانى وما شابهها
ومع هذا ما ان يجد اغنية فى اى فيلم او اعلان

الا والاقى صاحبنا يرقص كانه مولود فى مرقص
هو يرقص وانا اصرخ قائلة

يا بتاع الازهر يا واد انت
يابتاع الازهر يا منعنع

انا مسلمة متدينة محجبة بلا تشدد
الاعتدال فى كل شئ هو منهجى

البعض يقول لى لا تعرضيه للتناقضات

وادخليه مدرسة عادية


وانا ارى ان الازهرى يناسب ظروفه اكثر
فهو وحيد فى هذه الدنيا لا اب له ولا اخ او اخت
واريد ان تساعدنى المدرسة فى تنشئته وتربيته

وتساءلت لماذا يوجد الاصدقاء؟؟؟؟
وفى مساعدتكم لى بالرأى والمشورة الاجابة
افيدونى افادكم الله .............

بيبى فى KG2

فيه حد عنده شهرين ويدخل امتحان
دا انتم اكتر افترى من مناهج Kg2 فى مصر
واللى كنت فاكراها بنوتى الهادية زوجة عنيدة بعثت لى بالهدية اياها
ولازمن احترم الطقوس الملكية واجاوب

اسمك
اسم اللبان

سنك...؟
على راى شيرهان
والنعمة زى مانتم عاوزين
اصل انا شكلى يدى كل الاعمار
اصلى سنى بيمط.اوووول ساااااايز

طيب بجد هو فيه خمسة ويقبل القسمة على خمسة
كلموا الجهاز المركزى للمحاسبات يحلهالكم بقى

مجال دراستك ؟

الدوافع النفسية لسلوك الفرد
وحتى الان مش عارفاها

العمل
الان
مربية ومعلمة ومروضة وحوش لابنى الصغير
واراجوووووووز لباباي اعمله عجين الفلاحة يوميا
واخر الليل صديقة وام لابنى الكبير تيفا الجن 22 سنة هو ابن اختى بس عايش معايا .

اسم مدونتك ..؟

القدر وانا

الصوره الرمزيه لمدونتك بتعبر عن ايه ...؟

قدرى الفارس الهمام شرفنطح ابنى فارد ايديه للدنيا ولا هامه حاجة.

فكرت في اغلاق المدونه ؟ والسبب ..؟

اطلاقا ... انا بلاقى نفسى فيها

ايه رد فعلك لو حد قل ادبه عليك في تعليق ...؟

هودا ما حصلش ..

بس انا غالبا هحذف التعليق واقول
لوطلع العيب من اهل العيب مش عيب

(مثل فلاحى شهير عندنا)

اسوء مدونه...؟

لم أقراها بعد

هيحصل ايه للايميل بتاعك لما تموتى؟

الورثة حيقطعوا بعض عليه
وفى الغالب سيفوز به ابى لان انشاء الله حاموت قبله ويجيلكم بقى يوريكم.

اديت الباسوورد بتاعك لحد ...؟

ايوة مع ابنى الواد الوسيم تيفا الجن .

السفر بالنسبالك ايه ...؟

السفر.......للفسحة متعة....للاقامة غربة.

المود بتاعك ؟

متقلب ... زى بحر اسكندرية .

بتعملى ايه في وقت فراغك..؟
بروح مكتبة اسكندرية لانى عضوة عاملة فيها.

قبل المدونة كنت ألعب سبيدر سوليتير اوطاولة
عشان اريح النافوخ من التفكير
وبعد المدونة ولا دقيقة فراغ
يا عالم نافوخى ارتاح معاكم

ونفسوياتى اتظبطت على واحدة وربع.

الاكلة المفضله

شركسية بالفراخ
يعنى أرز ابيض وفراخ

وعليهم تقلية توم بسوس عين الجمل
ايوة يا عالم سوووووس مش صوص.

الصفات اللي ورثتها عن والدك.؟

شوية عصبية بس هو بيروق نفسه اسرع

الصفات اللي ورثتها عن والدتك ..؟

كل حاجه حلوه فيا تبقي منها وخاصة حب الخير والعطف على الضعيف.

اكتر ست حاجات بتكرهيها...؟
الظلم .. الكدب.. الخيانه.. القسوة.. البخل... ثم البخل

اكتر ست حاجات بتحبيها...؟

بعد الله ورسوله و امى

مرمر وتيفا وشرفنطح.

شط اسكندرية حتى لو غضبان

وكل اللى يشيل شغل البيت عنى.

شخصيتك نوعها ايه....؟
رومانسية واقعية
ضعيفة وقوية
اجتماعية الى حد ما.

لماذا دخلت عالم التدوين ...؟

بالصدفة حينما طلبت منى صديقتى انا هو اقرا ما كتبت
فانشأت مدونة فى نفس اليوم
لانى طول عمرى اكتب واصرخ على الورق
ايوة جبانة
فيه اعتراض
هو حد حيدخل ينضرب بدالى يعنى.

اجمل كلمه اتقالت في وصف مدونتك.....؟

كل كلمه بتتقال بتسعدني جدااا

أهمية التعليق بالنسبه ليك ؟
زى ما اتقال من قبل
هو فيه مطرب من غير مستمعين ونقاد .

احسن بوست كتبته ....؟
عروسة بابا هو مش احسن

بس عاوزة اعيد النداء من تانى
يمكن تلاقو عروسة لهذا الشاب العتى ذو الاربعة وستين حصان.

اجمل بوست

كتيييييير (كل الناس اللي موجوده عندي ) عندهم بوستات جميلة

وهم فعلا اصدقاء العقل والقلب

انا عاشقة لمدونة ستيتة ..
احس بالحزن والثورة مع صوت بيرم المصرى
وباضحك من قلبى مع ضايع والمصرى
وبحب الرومانسية فى احساس طفلة رومانسية بس واقعية ودودو وانا هو واحساس عيوشة
وبحب براءة زوجة عنيدة وفتافيت وعاشقة وغلبانة ,وبنت خيخة ومنووش

وعقلل صبرنى ريم وابن رشد واحمد ابو العلا وبحر الدموع وسهران ودماغى وانا حر فيها ومسدس صغير

واحس بقربى من الله مع المصرية والفقيرة الى الله وموناليزا وعالم جيجى وشوية شوية ود.توكل وغربتى

واستمتع بتامر على وابراهيم ومعتز شاهين ,وحاسبوتية

كتير والله استمتعت معاهم بس مش قادرة افتكر
سامحونى زهايمر
لحقتم تنسوا سنى يا جبابرة.

تمررى التاج لمين ...؟

اهديه للزهرة الجميلة اناهو

واقول لها اطلعى من مخبأك وجاوبى واكتبى كفاية على جوزك حب كده

عايزة اقول لكم حاجة اخيرة
باحبكم كلاتكم ومتاكدة اننا كلنا بنحب بعض وبنرتاح فى الكلام مع بعض
يعنى بقينا عصابة اكبر من عصابة الحزن الوطنى على راى القائد والزعيم
المصرى