النهاردة فرحى يا جدعان

النهاردة فرحى ياجدعان

اليوم 10 مارس ..عيد ميييييييييييييييييلادى
حاسة انى سعيدة .. رغم عدم وجود جديد فى حياتى
تعرفوا دا عيد ميلادى الكام ؟؟؟؟؟؟؟؟؟؟

على راى ستيته اختشى.. حبيبتشى
كلنا فى التمانتشر ما بنعديهاااااااااااااااااااش ابدا.

زمان ولحد من سنتين ويمكن اقل
كان اللى يسال واللى ما يسالش اقوله سنى
وكنت باسخر من الناس اللى تدارى سنها..

سبحان الله ... داين تدان ...

جه اليوم اللى مش عاوزة اقول سنى كام...
الست هى الست مفيش فايدة..
مش خوف من الحسد ولا غيره..
دانا حتى سنى فيه رقم خمسة.. يعنى من 35 -حتى-- 75 يبقى ماشى

على اليمين او الشمال برضه ماشى....

لكن مش حاسة والله انى كبرت...........

لسه حاسة قلبى اخضر..

بجد والله

قلب اخضر لم يدخله الكره او الحقد ابدا والحمد لله..
رغم ما عانيت خلال رحلة طويلة مع الحياة

المهم قلت لنفسى تتمنى ايه يا بت يا صغنونة فى اليوم ده

لقيتنى باتمنى ثلاث حاجات
الصحة..
الستر..
اخس عشرة كيلو ... والله الله لو كانو خمستاشر

ادعوا معايا ربنا يحقق لى احلامى

شرفنطح باشا .. ( عجوز فى السابعة)
قاللى
تحبى اجيب لك هديه ايه يا ست الكل ...
اي والله دا حصل
فرحت انا طبعا زى الهبلة العبيطة ام بدوى..

قالى : انا نفسى اجيبلك حاجات كتير يا مامى
انا حاجيب لك فيلا كبيرة وفيها سكيورتى وكاميرات فى كل مكان
وكمان حا جيب لك عربية فور باى فور
وحا جيب لك حاجات حلوة كتير...

رديت بهبل... مرسى يا حبيبى ربنا يخليك ليا.

بعد دقيقتين..قال
شفت انا عايز اجيب لك حاجات كتير ازاى ..
حضرتك حاتجيبى لى ايه بقى..؟؟؟؟؟؟؟؟؟؟؟
مش انا ابنك حبيبك....
اشترى لى لعبة بقى.....

وطبعا ضحك عليا واشتراله لعبة............

وكل سنة وانا مضحوك عليا

امضاء: الهبلة العبيطة ام بدوى فى عيد ميلادها التمنتاشر.........